YANGA YAKUBALI KICHAPO MBELE YA STAND UNITED

Mchezo wa Ligi Kuu ya Vodacom kati ya Stand United iliyokuwa mwenyeji wa Yanga, umemalizika kwa mabingwa watetezi wa VPL, Yanga kukubali kichapo kutoka kwa chama la wana, Stand United.

Mchezo huo umemalizika kwa Yanga kufungwa goli moja kwa bila, goli likifungwa na Pastory Athanas katika dakika ya 58 baada ya mabeki wa Yanga kuchanganyana na Athanas kutumia nafasi hiyo kwenda kufunga goli lililodumu hadi mchezo unamalizika.

Kwa matokeo hayo, Stand United imefikisha alama 12 ikiwa nafasi ya tatu ya msimamo wa VPL na Yanga ikisalia na alama 10.

Kipigo hicho kwa Yanga kinakuja ikiwa imesalia wiki moja kabla ya kukutana na watani zao wa jadi Simba, mchezo unaotaraji kupigwa Jumamosi ya Oktoba mosi katika dimba la taifa.