WANACHAMA NSSF SINGIDA WATAKIWA KUHAKIKI TAARIFA ZA MICHANGO YAO KABLA YA KUSTAAFU

Meneja wa Mfuko wa Taifa wa Hifadhi ya Jamii (NSSF), Mkoa wa Singida, Oscar Kalimilwa (katikati) akiongoza kukata keki maalumu ya Maadhimisho ya Wiki ya Huduma kwa Wateja duniani 2024 Mkoa wa Singida yalioanza leo. Kulia ni Mwanachama wa mfuko huo, Yohana Julius na kushoto ni Afisa Huduma kwa Wateja NSSF Mkoa wa Singida, Latifa Singano.

............................

 Imeandaliwa na Mtandao wa Singidaniblog

WANACHAMA wa Mfuko wa Taifa wa Hifadhi ya Jamii (NSSF) wametakiwa kujenga utamaduni wa kufuatilia na kuhakiki taarifa za michango yao mara kwa mara wakiwa kazini badala ya kusubiri wakiwa wamestaafu.

Ombi hilo limetolewa Oktoba 7, 2024 na Meneja wa NSSF Mkoa wa Singida, Oscar Kalimilwa ambaye alikuwa mgeni rasmi wa ufunguzi wa maadhimisho ya wiki ya huduma kwa wateja duniani 2024 Mkoa wa Singida.

“Niwakumbushe wanachama wetu kuhakiki taarifa za michango wanapokuwa kazini ili kuepuka usumbufu wa kufuatilia michango yao wanapokua tayari wamestaafu au kuwa nje ya ajira kwani jambo hili huwaletea usumbufu, kukosa ushirikiano kutoka kwa baadhi ya waajiri wao na hivyo kuleta chuki baina ya wanachama na Mfuko pale wanaposhindwa kulipwa mafao kwa wakati,” alisema Kalimilwa.

Kalimilwa alisema wiki ya huduma kwa wateja ilianzishwa rasmi kimataifa mwaka 1987 kwa lengo la kutambua umuhimu wa huduma bora kwa wateja na juhudi za wafanyakazi wanaotoa huduma bora kwa wateja.

Alisema kwa mwaka huu 2024 maadhimisho hayo yanaanza leo Oktoba 07, 2024 na yatafikia tamati Oktoba 11, 2024.

“Tunatambua mchango mkubwa wa wateja wetu katika kuwezesha mfuko wetu kuendelea kufanya shughuli zake kuu nne ambazo ni Uandikishaji wa wanachama, Ukusanyaji wa michango, Ulipaji wa mafao pamoja na Uwekezaji,”. alisema Kalimilwa. 

Alisema pamoja na mambo mengine, mfuko hutumia maadhimisho hayo ya wiki ya huduma kwa wateja kutoa shukrani kwa wateja kwa kutambua mchango wao katika kukuza mfuko huo na kuwa ni wazi kuwa uendelevu na ustahamilivu wake unategemea wateja.

“ Naomba kuwaahidi kwa niaba ya Bodi ya Wadhamini kwamba Mfuko wa Taifa wa Hifadhi ya Jamii (NSSF) utaendelea kutoa huduma bora zaidi popote wateja wetu  walipo na tutawafikia kidigitali zaidi,” alisema Kalimilwa.

Akizungumzia hali ya mfuko kwa sasa alisema hadi kufikia mwishoni mwa mwaka wa fedha 2023/2024 mfuko ulikuwa na wanachama 1,354,985 na waajiri 43,430 na kuwa kwa  mwaka wa fedha 2023/2024 mfuko uliandikisha wanachama wapya 291,266 huku wakijiwekea malengo ya  kuandikisha wanachama wapya 324,321 kwa mwaka huu wa fedha 2024/2025.

Alisema kutokana na hali hiyo ni dhahiri kuwa mfuko unakua kwa kasi hivyo ni lazima kasi ya ukuaji wa mfuko iende sambamba na ubora wa huduma zinazotolewa na mfuko kwa wanachama wao.

Akizungumzia wajibu wa watumishi wa mfuko huo alisema wana  kazi kubwa ya kuhakikisha wanafikia matarajio ya wateja na wadau wao ikiwa ni pamoja na wastaafu wanaopokea pensheni, wanachama waliopo sasa na wa baadaye lakini pia Serikali kwa kutoa huduma bora na rafiki na kwa kuzingatia hilo, mfuko umewekeza katika kuboresha mifumo ya TEHAMA ili kuwafikia wanachama wake kwa urahisi na kwa haraka popote walipo.

Aidha, Kalimilwa alisema sasa mfuko umeshakamilisha taratibu zote za uanzishwaji wa mfumo wa ufunguzi na malipo ya mafao kupitia mtandao na huduma hiyo imeshaanza kwa baadhi ya mikoa.

“Huduma hii inatoa fursa kwa wanachama walioko mbali na matawi yetu kuweza kufungua madai mahali popote walipo, kufuatilia maendeleo ya ulipaji na hatimaye kulipwa kwa mujibu wa kanuni za ulipaji wa mafao,” alisema Kalimilwa.

Aidha, kwa sasa Mfuko umeshakamilisha taratibu zote za uanzishwaji wa mfumo wa ufunguzi na malipo ya mafao kupitia mtandao na huduma hii imeshaanza kwa baadhi ya mikoa. Huduma hii inatoa fursa kwa wanachama walioko mbali na matawi yetu kuweza kufungua madai mahali popote walipo, kufuatilia maendeleo ya ulipaji na hatimaye kulipwa kwa mujibu wa kanuni za ulipaji wa mafao.

Kalimilwa alitumia nafasi hiyo kumpongeza Rais Dkt. Samia Suluhu Hassan na kumshukuru kwa kuwajali wananchi wake, kwa usikivu na juhudi kubwa zilizofanywa na zinazoendelea kufanywa na Serikali yake ya awamu ya sita katika kuboresha maisha ya Watanzania.

 Aidha, alimpongeza na kumshukuru kwa namna anavyoendelea kutoa kipaumbele katika uwekaji mazingira wezesheji kwa wawekezaji wa miradi mikubwa ambayo imeongeza ajira na hivyo kuongeza wanachama na wachangiaji katika mfuko.

“Kwa upande wa masuala ya afya, Serikali ya awamu ya sita imeboresha sana eneo hili kwa kujenga Hospitali na vituo vingi vya afya na kuongeza vifaa tiba na Watumishi, juhudi ambazo zimeleta tija kubwa kwa wanachama wetu na familia zao kupata huduma bora za mafao ya matibabu,” alisema Kalimilwa.

Katika hatua nyingine kwa niaba ya Bodi ya wadhamini, aliwashukuru na kuwapongeza watumishi wote wa mfuko kwa juhudi kubwa za pamoja wanazozifanya katika kuwahudumia wanachama wao na kuwa mfuko unatambua mchango wao katika kutekeleza majukumu waliyonayo.

Kalimilwa alisema mfuko umeboresha mfumo wa Sekta isiyo rasmi mahsusi kwa wanachama wote waliojiajiri, na umeandaa skimu maalum kwa wafanyakazi walio katika sekta rasmi ili kuweza kujichangia kwa hiari kupitia skimu hiyo.

Alisema pamoja na mambo mengine, Skimu hizo mbili (NISS na SS) zinalenga kupanua wigo wa huduma za hifadhi ya jamii nchini na hivyo kuchangia katika kuondoa umaskini kwa watanzania walio wengi na kuwa mfuko unaendelea kuweka mikakati ya kutosha ili kuhakikisha kwamba watanzania wengi wanajiunga kwenye skimu hizo.

Aidha, Kalimilwa alitumia nafasi hiyo kuwakumbusha waajiri kutekeleza jukumu lao la kulipa michango ya kwenye mfuko kwa wakati na kwa mujibu wa sheria na kueleza kuwa jambo hilo ni muhimu sana kwa vile michango hiyo ikilipwa kwa wakati itaondoa kero ya ufuatiliaji wa mafao kwa wanachama.

Alisema kupitia mikakati hiyo, mfuko utaendelea kuishi kauli mbiu ya mwaka huu isemayo “Huduma Bora Popote Ulipo” na kuwa sasa ni mwaka wa tatu wamekuwa wakishiriki kusherehekea maadhimisho hayo ya wiki ya huduma kwa wateja.

Afisa wa NSSF Mkoa wa Singida, Keneth Kalinjuma, alisema hivi sasa Mfuko huo umepanua wigo wa hifadhi ya jamii kwa kuyafikia makundi yote ya wananchi waliojiajiri, kama waendesha bodaboda, bajaj, mama na baba lishe, wakulima na wafugaji ambao wanafika kujiandisha kwa ajili ya kuweka akiba zao ambazo zitakuja kuwasaidia baadae.

Meneja wa Mfuko wa Taifa wa Hifadhi ya Jamii (NSSF), Mkoa wa Singida, Oscar Kalimilwa (kushoto), akisoma hutuba ya maadhimisho hayo.

Meneja wa Mfuko wa Taifa wa Hifadhi ya Jamii (NSSF), Mkoa wa Singida, Oscar Kalimilwa akimlisha keki mwanachama wa mfuko huo, Yohana Julius. wakati wa hafla hiyo.

Mwanachama wa mfuko huo, Twaha Mwiru (kulia) akimlisha keke Meneja wa Mfuko wa Taifa wa Hifadhi ya Jamii (NSSF), Mkoa wa Singida, Oscar Kalimilwa. 

Afisa wa NSSF Mkoa wa Singida, Keneth Kalinjuma, akizungumzia maboresho makubwa yaliyofanywa na mfuko huo ambapo sasa makundi mbalimbali ya wananchi waliojiajiri yanaweza kuweka akiba yao NSSF.

Afisa Matekelezo kutoak Mfuko wa Jamii wa PSSSF Mkoa wa Singida akipongeza maboresho makubwa yaliyofanywa na Mfuko wa NSSF.

Wageni waalikwa wakiwa kwenye hafla hiyo.

Meneja wa Mfuko wa Taifa wa Hifadhi ya Jamii (NSSF), Mkoa wa Singida, Oscar Kalimilwa. akimlisha keki mwanachama wa Mfuko huo, Hashimu Ramadhani.

Meneja wa Mfuko wa Taifa wa Hifadhi ya Jamii (NSSF), Mkoa wa Singida, Oscar Kalimilwa. akimlisha keki Mfanyakazi wa NSSF Mkoa wa Singida.

Meneja wa Mfuko wa Taifa wa Hifadhi ya Jamii (NSSF), Mkoa wa Singida, Oscar Kalimilwa, akiwa katika picha ya pamoja na wafanyakazi wa mfuko huo, wanachama na wageni waalikwa waliohudhuria hafla hiyo.