Serikali ya Mapinduzi Zanzibar kutumia kituo cha taifa cha data

 Makamu wa Pili wa Rais wa Serikali ya Mapinduzi ya Zanzibar Mhe. Balozi Seif Ali Iddi (wa pili kulia) akioneshwa Mfumo wa kukusanya Mapato wa Kielektroniki uliopo Kituo cha Taifa cha Data, Dar es Salaam na mtaalamu wa umeme na mifumo ya upozaji wa Kituo hicho Bwana. Deus Lwabukuna. 

 Makamu wa Pili wa Rais wa Serikali ya Mapinduzi ya Zanzibar, Mhe. Balozi Seif Ali Iddi (aliyesimama) akifafanua jambo kuhusu utayari wa taasisi za Serikali yake kutumia Kituo cha Taifa cha Data kilichopo Dar es Salaam. Anayesikiliza wa kwanza kushoto ni Katibu Mkuu wa Mawasiliano, Wizara ya Ujenzi, Uchukuzi na Mawasiliano Dkt. Eng. Maria Sasabo na wa kwanza kulia ni Mtendaji Mkuu wa TTCL Bwana Waziri Waziri Kindamba.

 Makamu Mwenyekiti wa Kamati ya Bunge ya Miundombinu Mhe. Selemani Moshi Kakoso (aliyesimama) akichangia jambo kuhusu matumizi ya Kituo cha Taifa cha Data wakati wa ziara ya Makamu wa Pili wa Rais wa Serikali ya Mapinduzi ya Zanzibar, Mhe. Balozi Seif Ali Iddi (hayupo pichani) alipotembelea kituo hicho Dar es Salaam.

 Mwenyekiti wa Bodi ya Kampuni ya Simu Tanzania (TTCL) Eng. Omary Nundu (aliyesimama) akisisitiza jambo wakati wa ziara ya Makamu wa Pili wa Rais wa Serikali ya Mapinduzi ya Zanzibar, Mhe. Balozi Seif Ali Iddi (hayupo pichani) alipotembelea kituo cha Taifa cha Data kilichopo Dar es Salaam.

Muonekano wa Mfumo wa Kukusanya Mapato wa Kielektroniki (electronic Revenue Collections System – eRCS) uliopo kwenye Kituo cha Taifa cha Data kilichopo Dar es Salaam. 

...

Serikali ya Mapinduzi ya Zanzibar imevutiwa na utendaji kazi wa Kituo cha Taifa cha Data (National Internet Data Centre-NIDC) kwa kukusanya mapato ya Serikali kwa kutumia Mfumo wa Kukusanya Mapato wa Kieletroniki (eRCS – electronic Revenue Collections System)hivyo kuongeza mapato ya Serikali ya Muungano ya Tanzania na Mapinduzi ya Zanzibar.

Hayo yameelezwa leo na Makamu wa Pili wa Rais wa Serikali ya Mapinduzi ya Zanzibar, Mhe. Balozi Seif Ali Iddi alipotembelea Kituo cha Taifa cha Data kilichopo Dar es Salaam. Katika ziara hiyo, Balozi Iddi amevutiwa na kuridhishwa na utendaji kazi wa Kituo hicho ambapo kinatumia Mfumo wa Kukusanya Mapato wa Kielektroniki ambao umeunganisha taasisi za Serikali na sekta binafsi. “Zanzibar tunategemea sekta ya utalii kuongeza mapato yetu, wadau wote wa sekta hii wajiunge na mfumo huu pamoja na taasisi zote za Serikali ya Mapinduzi ya Zanzibar ili tuweze kuona makusanyo ya mapato yetu kwa wakati, ufanisi na kwa uhakika”, amesema Balozi Iddi. Mhe. Balozi Iddi ameongeza kuwa Mfumo huu unasaidia kukusanya mapato ya Serikali, Serikali inataka kuwatumikia wananchi wake na kuwaletea maendeleo na hakuna Serikali yoyote inayoweza kufanya hayo bila ya kodi.

Katibu Mkuu wa Mawasiliano, Wizara ya Ujenzi, Uchukuzi na Mawasiliano Dkt. Eng. 

Maria Sasabo ambaye amemuwakilisha Waziri wa Ujenzi, Uchukuzi na Mawasiliano Prof. Makame Mbarawa amesema kuwa Serikali ya Muungano wa Tanzania tayari inashirikiana na Serikali ya Mapinduzi ya Zanzibar kupitia Mfumo huu kukusanya na kuongeza mapato ya Serikali ambapo yatawezesha Serikali zetu kuhudumia wananchi wake katika nyanja ya afya, elimu, miundombinu, maji, barabara na kilimo cha kisasa. 

Mtendaji Mkuu wa Kampuni ya Simu Tanzania (TTCL) Bwana Waziri Waziri Kindamba amesema kuwa Mfumo huo umetengenezwa na wataalamu wazalendo wa watanzania wakishirikiana kwa pamoja kutoka Serikali ya Jamhuri ya Muungano wa Tanzania na Serikali ya Mapinduzi ya Zanzibar na wanahusika katika uendeshaji wa Mfumo huo. 

Pia, ameongeza kuwa taasisi za Serikali na sekta binafsi zitumia Mfumo huo na hadi hivi sasa jumla ya Kampuni saba za mawasiliano na benki kumi na nne zimeunganishwa kwenye Mfumo huo na makusanyo ya mapato yao yanapita na kuonekana kwenye Mfumo huo. Bwana Kindamba amesema kuwa Serikali ya

Mapinduzi ya Zanzibar imeweza kuongeza makusanyo ya mapato yake kutoka shilingi milioni kumi na tatu hadi milioni mia tano kwa mwezi kupitia Mfumo huo tangu ulipoanza rasmi kutumika ulipozinduliwa na Rais wa Jamhuri ya Muungano wa Tanzania, Dkt. John Pombe Magufuli mwezi Juni mwaka huu hadi Agosti mwaka huu.

Naye Makamu Mwenyekiti wa Kamati ya Bunge ya Miundombinu Mhe. Selemani Moshi Kakoso ameiomba Kampuni ya Simu Tanzania (TTCL) kufanya kazi kibiashara zaidi na kwa faida na sio kwa mazoea kama hapo awali. 

Vile vile Mwenyekiti wa Bodi ya TTCL, Eng. Omary Nundu amesema kuwa azma ya Bodi yake ni kuhakikisha kuwa TTCL inaendelea kutoa huduma za mawasiliano kwa wananchi nchi nzima na ameiomba Serikali kuendelea kuiunga mkono kampuni kongwe ya kizalendo, TTCL ili iweze  kujiendesha kwa faida.

Kituo cha Taifa cha Data kimejengwa na Serikali ya Muungano ya Tanzania kupitia Wizara ya Ujenzi, Uchukuzi na Mawasiliano kuanzia mwaka 2014 na kukamilika mwaka 2015 kwa gharama ya dola za marekani milioni thelathini na tano na ni cha kiwango cha kimataifa.

Imetolewa na Kitengo cha Mawasiliano Serikalini, Wizara ya Ujenzi, Uchukuzi na Mawasiliano